شینزن (تھرسڈے ٹائمز) — وزیراعظم شہباز شریف نے کہا ہے کہ دنیا کو چین کی ترقی سے سیکھنا چاہیے، ہم چین کے عظیم اقتصادی ماڈل کی پیروی کریں گے، پاکستان کے پاس ہر قسم کے وسائل موجود ہیں، ہماری سب سے بڑی طاقت ہماری نوجوان افرادی قوت ہے۔
وزیراعظم شہباز شریف نے چین کے شہر شینزن میں منعقد ہونے والی پاک چائنہ بزنس فورم کی تقریب سے خطاب کرتے ہوئے کہا ہے کہ چین کا دورہ میرے لیے بہت زیادہ اہمیت کا حامل ہے، بزنس کانفرنس میں آئے تمام نمائندوں کو خوش آمدید کہتا ہوں اور چین کو شاندار بزنس کانفرنس کے انعقاد پر مبارکباد پیش کرتا ہوں۔
وزیراعظم شہباز شریف کا کہنا تھا کہ شینزن کی ترقی ہمارے لیے مشعلِ راہ ہے، دنیا کو چین کی ترقی سے سیکھنا چاہیے، شینزن نے مختصر مدت میں ترقی کی منازل طے کی ہیں، پاکستانی کمپنیز اپنی مصنوعات کو بہتر انداز میں دنیا کے سامنے پیش کریں، پاکستان کے پاس ہر قسم کے وسائل موجود ہیں، ہماری سب سے بڑی طاقت ہماری نوجوان افرادی قوت ہے، چین نے ترقی کیلئے فرسودہ طریقہ کار کو ترک کر کے جدید طریقے اپنائے ہیں۔
انہوں نے کہا کہ آج پاکستان کی معیشت کا چین کے ساتھ کوئی مقابلہ نہیں، پاکستان بدعنوانی پر قابو پانے کیلئے مؤثر اقدامات کررہا ہے، پاکستان کے اندر کاروبار میں آسانی پیدا کرنے کیلئے بزنس کونسل قائم کی، قائداعظم محمد علی جناح کے ویژن پر عمل پیرا ہو کر ملک کو ترقی دلائیں گے، بیلٹ اینڈ روڈ منصوبہ ترقی کی ضمانت ہے، چین مختصر وقت میں دنیا کی دوسری بڑی معیشت اور فوجی طاقت بن گیا ہے، میں یہاں قرضوں کیلئے نہیں بلکہ کاروبار اور ترقی کیلئے آیا ہوں، چین نے پاکستان کے ہر صوبے میں منصوبوں کی بنیاد رکھی ہے۔
وزیراعظم شہباز شریف نے اپنے پانچ روزہ دورہِ چین کے پہلے مرحلے میں شینزن میں خطاب کے دوران چینی باشندوں پر دہشتگرد حملے کا ذکر کرتے ہوئے کہا کہ پانچ چینی باشندوں کی دہشتگرد حملے میں ہلاکت دردناک لمحہ تھا، ہم نے تہیہ کیا ہے کہ چینی باشندوں کو فول پروف سکیورٹی فراہم کریں گے۔
وزیراعظم شہباز شریف کا کہنا تھا کہ چینی صدر نے 700 ملین لوگوں کو غربت کے عذاب سے نکالا، پاکستان کے معاشی اعداد و شمار 50 اور 60 کی دہائی میں چین سے بہتر تھے، ہم پنجاب سپیڈ کو پاکستان سپیڈ میں تبدیل کریں گے، پاکستان کے پاس 10 ٹریلین ڈالرز کے معدنی ذخائر موجود ہیں۔
انہوں نے مزید کہا کہ چین کو دباؤ میں لانے کی ہر ممکن کوشش کی گئی مگر چینی عوام اور چینی قیادت نے دباؤ کے آگے نہ جھکنے اور کامیابی حاصل کرنے کا آہنی عزم کیا، ہم اسی آہنی عزم کے ساتھ پاکستان واپس جائیں گے اور عظیم چینی اقتصادی ماڈل کی پیروی کریں گے۔
قبل ازیں وزیرِاعظم شہباز شریف کی شینزن میں چینی کمپنی ’’ٹرانشیئن ہولڈنگز‘‘ کے بانی و چیئرمین ژو ژاؤ جیانگ سے ملاقات ہوئی جبکہ چینی کمپنی نے پاکستان میں اپنے موبائل بنانے کے یونٹ میں سرمایہ کاری کو فروغ دینے میں اپنی دلچسپی ظاہر کی۔
