اسلام آباد (تھرسڈے ٹائمز) — بانی تحریکِ انصاف عمران خان کی اہلیہ بشریٰ بی بی کی 190 ملین پاؤنڈز کرپشن کیس میں درخواست ضمانت قبل از گرفتاری منظور کر لی گئی۔
احتساب عدالت اسلام آباد میں جج محمد علی وڑائچ نے عمران خان اور ان کی اہلیہ بشریٰ بی بی کے خلاف 190 ملین پاؤنڈز کرپشن کیس کی سماعت کی ہے، سماعت کے دوران ڈپٹی پراسیکیوٹر جنرل مظفر عباسی نے دلائل دیتے ہوئے کہا کہ بشریٰ بی کی گرفتاری مطلوب نہیں ہے۔
ڈپٹی پراسیکیوٹر جنرل مظفر عباسی نے کہا کہ چیئرمین نیب نے بشریٰ بی بی کے وارنٹ آف اریسٹ جاری نہیں کیے، جب وارنٹ آف اریسٹ جاری نہیں ہوئے تو درخواست ضمانت غیر موثر ہے، دس ماہ قبل بھی ہمارا یہی موقف تھا کہ بشریٰ بی بی کے وارنٹ آف اریسٹ جاری نہیں کیے۔
اسلام آباد کی احتساب عدالت میں عمران خان اور بشریٰ بی بی کے خلاف 190 ملین پاؤنڈز کرپشن کیس کی سماعت کے دوران استغاثہ کے تین گواہان پر وکلاء صفائی نے جرح مکمل کر لی ہے، ریفرنس میں مجموعی طور پر 27 گواہان پر جرح مکمل کی جا چکی ہے۔
واضح رہے کہ 190 ملین پاؤنڈز کرپشن کیس میں درخواست ضمانت منظور پونے کے باوجود عمران خان کی اہلیہ بشریٰ بی بی جیل سے رہا نہیں ہو سکتیں کیونکہ وہ دورانِ عدت نکاح کیس میں سات برس قید کی سزا کاٹ رہی ہیں۔
احتساب عدالت اسلام آباد نے 190 ملین پاؤنڈز کرپشن کیس کی مزید سماعت 5 جولائی تک ملتوی کر دی ہے۔
