راولپنڈی (تھرسڈے ٹائمز) — اڈیالہ جیل میں 190 ملین پاؤنڈز کرپشن کیس کی سماعت، سابق وزیرِ دفاع پرویز خٹک نے عدالت میں اپنا بیان ریکارڈ کرا دیا۔
احتساب عدالت راولپنڈی کے جج محمد علی وڑائچ نے اڈیالہ جیل میں سابق چیئرمین تحریکِ انصاف عمران خان اور ان کی اہلیہ بشریٰ بی بی کے خلاف 190 ملین پاؤنڈز کرپشن کیس کی سماعت کی ہے جبکہ ریفرنس کے گواہ پرویز خٹک نے اپنا بیان ریکارڈ کرا دیا ہے۔
ملزمان عمران خان اور بشریٰ بی بی بھی کمرہِ عدالت میں موجود تھے، ملزمان کی جانب سے وکلاء عثمان ریاض گل اور چوہدری ظہیر عباس عدالت کے سامنے پیش ہوئے جبکہ نیب کی جانب سے امجد پرویز اور سردار مظفر عباسی لیگل ٹیم کے ہمراہ پیش ہوئے،
اڈیالہ میں 190 ملین پاؤنڈز کرپشن کیس کی سماعت کے دوران پرویز خٹک نے اپنے بیان میں کہا ہے کہ نیب نے مجھ سے مئی 2023 میں 190 ملین پاؤنڈز سے متعلق بیان لیا، شہزاد اکبر نے کابینہ کو بتایا تھا کہ برطانیہ میں پاکستان سے غیر قانونی طور پر باہر بھجوائی گئی بڑی رقم پکڑی گئی ہے اور وہ اب پاکستان کو واپس کی جائے گی۔
سابق وفاقی وزیرِ دفاع پرویز خٹک کا کہنا تھا کہ یہ معاملہ کابینہ کے ایجنڈے پر نہیں تھا بلکہ اضافی ایجنڈے کے طور پر سامنے لایا گیا اور اسے کابینہ سے منظور کرایا گیا، اضافی ایجنڈے پر مجھ سمیت کابینہ کے دیگر اراکین نے اعتراض کیا تھا، کابینہ میں رقم کے حوالہ سے کاغذات بند لفافہ میں پیش کیے گئے، ریفرنس کے تفتیشی نے مجھے بتایا کہ ایجنڈے کے ساتھ ایک تحریر بھی تھی اور وہ یہ تھی کہ رقم بحریہ ٹاؤن کے مالک ملک ریاض نے برطانیہ منتقل کی تھی۔
اڈیالہ جیل راولپنڈی میں 190 ملین پاؤنڈز کرپشن کیس میں آج کی سماعت میں ایک گواہ پر جرح مکمل اور ایک گواہ کا بیان قلمبند ہوا، سابق وزیر زبیدہ جلال اور سابق وزیراعظم کے پرنسپل سیکرٹری اعظم خان پیش نہ ہوئے، عدالت نے ریفرنس کی مزید سماعت 13 جولائی تک ملتوی کر دی۔
