لاہور (تھرسڈے ٹائمز) — وزیرِ اعلٰی پنجاب مریم نواز شریف نے ’’اپنا گھر اپنی چھت‘‘ منصوبہ کا افتتاح کر دیا، انہوں نے کہا کہ اپنی چھت اور اپنا گھر سب سے بڑی نعمت ہیں، اس خواہش کی شدت ان سے پوچھیں جن کے پاس اپنا گھر نہیں ہوتا، لوگ گھر بنانے کیلئے ساری زندگی محنت کرتے ہیں، آپ کے پاس سب نعمت ہو لیکن اپنا گھر نہ ہو تو وہ کمی محسوس ہوتی ہے جس کو بیان کرنا مشکل ہے۔
وزیرِ اعلٰی پنجاب مریم نواز شریف نے لاہور میں’’اپنا گھر اپنی چھت‘‘ منصوبہ کی افتتاحی تقریب سے خطاب کرتے ہوئے کہا کہ اپنی چھت اور اپنا گھر سب سے بڑی نعمت ہیں، میں وہ سکیم شروع کر رہی ہوں جس کا مجھے اور صوبے کے عوام کو بہت زیادہ انتظار تھا، اس سکیم کے بارے میں مجھ سے بہت سوال کیے جاتے تھے کہ یہ کب آ رہی ہے، جس کے پاس اپنا گھر ہوتا ہے اس کو اس نعمت کی قدر کم ہوتی ہے، اس خواہش کی شدت ان سے پوچھیں جن کے پاس اپنا گھر نہیں ہوتا، آپ کے پاس سب نعمت ہو لیکن اپنا گھر نہ ہو تو وہ کمی محسوس ہوتی ہے جس کو بیان کرنا مشکل ہے۔
مریم نواز شریف کا کہنا تھا کہ ہم یہ منصوبہ شروع کرنے میں کامیاب ہوئے، امید ہے کہ اس سے آگے ہم جلدی جلدی گھر بنا کر لوگوں کو دیں گے، نواز شریف کو اس سکیم کا سب سے زیادہ انتظار تھا، اپنے دور میں انہوں نے ہاریوں کو گھر دیئے، وہ مجھ سے کہتے تھے کہ کسی کو رہنے کیلئے چھت دے دو تو اس سے بڑی خدمت کوئی نہیں، اگر اس سکیم میں شہری علاقوں میں عوام کے پاس ایک سے 5 مرلے کی زمین ہے اور دیہی علاقے میں ایک سے 10 مرلے کی زمین ہے تو 15 لاکھ تک حکومت پنجاب دے گی جس کو 7 سال کی آسان اقساط میں ادا کرنا ہو گا، پہلے 3 مہینے ایک پیسہ بھی نہیں دینا پڑے گا اور پھر ہر مہینے 15 لاکھ کیلئے 14 ہزار روپے ماہانہ ادا کرنے ہوں گے۔
چیف منسٹر پنجاب نے کہا کہ عوام کو مشکلات کا سامنا ہے اور مجھے اس بات کا احساس ہے، اگلے دو ماہ مشکل ہیں اس لیے ہم بجلی کے بلز میں ریلیف دے رہے ہیں اور پھر تاریخ کا سب سے بڑا سولر پروگرام بھی لے کر آ رہے ہیں، جن کے پاس زمین ہے اور چھت نہیں ہے وہ اس میں ایپلائی کر سکتے ہیں، اس قرضے میں بالکل بھی سود شامل نہیں ہے، اس میں کوئی سروس چارجز نہیں ، کوئی ٹیکس نہیں، کوئی خفیہ چارجز نہیں، میں نے بینک کو بھی اس میں اس لیے شامل نہیں کیا کیونکہ اس کے اپنے لوازمات ہوتے ہیں۔
محترمہ مریم نواز شریف نے بتایا ’’اپنا گھر اپنی چھت‘‘ سکیم کیلئے ایک نمبر بھی دیا گیا ہے، لوگ آن لائن بھی ایپلائی کرسکتے ہیں اور 080009100 پر کال کر کے بھی معلومات حاصل کرسکتے ہیں، ہر شہر کے ڈی سی آفس سے بھی معلومات لے سکتے ہیں، ہم نے کوشش کی ہے کہ اگر اپنا گھر نہیں ہے اور کرایہ ادا کرتے ہیں تو اس کرایے سے کم اس سکیم کی قسط رکھوں، ہم ’’اپنا گھر اپنی چھت‘‘ کی دوسری سکیم میں دو بیڈ رومز والے گھر ابتدائی طور پر 5 سے 6 اضلاع میں شروع کر رہے ہیں۔
وزیرِ اعلٰی پنجاب مریم نواز شریف نے کہا کہ لوگ گھر بنانے کیلئے ساری زندگی محنت کرتے ہیں، یہ سکیم اس خواہش کو مدِنظر رکھتے ہوئے بنائی گئی ہے، میرا ارادہ ہے کہ اس کو 5 سالوں میں ہم پنجاب کے ہر کونے تک لے جائیں، پنجاب ہر چیز میں لیڈ کر رہا ہے، پنجاب کو دیکھ کر لوگوں کی دوڑیں لگ گئی ہیں، میں روزانہ 16 گھنتے کام کرتی ہوں اور اسی وجہ سے سب سکیمز کو لانچ کرنے کا وقت آ گیا ہے، انشاءاللّٰه آنے والے دنوں میں آپ کو ہماری محنت رنگ لاتی دکھائی دے گی اور ہم کئی منصوبے لانچ کریں گے۔
