راولپنڈی (تھرسڈے ٹائمز) — آرمی چیف جنرل عاصم منیر نے کہا ہے کہ پاکستانی عوام سعودی عرب کیلئے گہری عزت اور محبت رکھتے ہیں، سعودی عرب کے بڑے تجارتی وفد کا دورہِ پاکستان دونوں ممالک کے مابین پائیدار اور برادرانہ تعلقات کی تصدیق کرتا ہے۔
آرمی چیف جنرل عاصم منیر کی سعودی عرب کے وزیرِ سرمایہ کاری خالد بن عبدالعزیز الفالح سے ملاقات ہوئی ہے جس میں مختلف شعبوں میں برادرانہ دوطرفہ تعاون کو مضبوط بنانے کے اقدامات پر تبادلہِ خیال کیا گیا ہے جبکہ آرمی چیف جنرل عاصم منیر نے شاہ سلمان بن عبدالعزیز اور ولی عہد شہزادہ محمد بن سلمان کی پاکستان کیلئے غیر متزلزل حمایت پر شکریہ ادا کیا ہے۔
پاک فوج کے شعبہ تعلقاتِ عامہ (آئی ایس پی آر) کی جانب سے جاری کیے گئے بیان کے مطابق سعودی تجارتی وفد کا دورہ پاکستان اور سعودی عرب کے درمیان پائیدار اور برادرانہ تعلقات کا مظہر ہے جبکہ آرمی چیف جنرل عاصم منیر نے سعودی وفد کو پاکستان کی جانب سے مکمل حمایت کی یقین دہانی کرائی ہے اور دونوں ممالک کیلئے اس دورے کے اچھے نتائج کی امید کا اظہار کیا ہے۔
جنرل عاصم منیر نے کہا ہے کہ پاکستانی عوام سعودی عرب کیلئے گہری عزت اور محبت رکھتے ہیں، سعودی عرب کے بڑے تجارتی وفد کا دورہِ پاکستان دونوں ممالک کے مابین پائیدار اور برادرانہ تعلقات کی تصدیق کرتا ہے۔
واضح رہے کہ سعودی وزیرِ سرمایہ کاری خالد بن عبدالعزیز الفالح کی قیادت میں ایک اعلٰی سطح کا سعودی وفد 3 روزہ دورے پر گزشتہ روز اسلام آبادد پہنچا جبکہ وفد میں سعودی عرب کی تعمیراتی، انجینئرنگ، انفارمیشن ٹیکنالوجی، زراعت، خوراک اور پیٹرولیم کی کمپنیز کے نمائندے شامل ہیں، اس اہم دورہ کے دوران سعودی عرب سے 2 ارب ڈالرز سرمایہ کاری کے معاہدوں کو حتمی شکل دیئے جانے کا امکان ہے، وزیراعظم شہباز شریف سعودی وفد کے اعزاز میں عشائیہ بھی دیں گے۔
