صوابی (تھرسڈے ٹائمز) — وزیرِ اعلٰی خیبرپختونخوا علی امین گنڈا پور نے کہا ہے کہ حقیقی آزادی کیلئے قربانی دینے کا وقت آن پہنچا ہے، عمران خان نومبر کے مہینے میں احتجاج کی کال دینے والے ہیں، قوم تیار رہے، عمران خان کال دیں گے اور وہ کال یہ ہو گی کہ اگر ہماری میتیں گھر نہ آئیں تو ہمارے جنازے پڑھ لینا، ہم تب تک واپس نہیں آئیں گے جب تک عمران خان کو جیل سے رہا نہیں کرا لیں گے۔
پاکستان تحریکِ انصاف کی جانب سے صوابی میں جلسہ سے خطاب کرتے ہوئے وزیرِ اعلٰی خیبرپختونخوا علی امین گنڈا پور نے کہا ہے کہ عمران خان کی قیادت میں حقیقی آزادی حاصل کرنے کیلئے قربانی دینے کا وقت آن پہنچا ہے، سب قربانی دینے کیلئے تیار ہو جائیں، ہمارے پاس دو آپشنز ہیں کہ یا اپنی عزت اور غیرت نیلام کر دیں یا پھر لڑنے اور مرنے کیلئے تیار ہو جائیں۔
وزیرِ اعلٰی خیبرپختونخوا علی امین گنڈا پور نے کہا کہ ہماری پارٹی کی خواتین جیلوں میں ہیں اور پنجاب میں ہمارے گھروں میں گھس کر چادر اور چار دیواری کو پامال کیا گیا ہے، یاد رکھو اس کا حساب دینا پڑے گا، تم ریاستی اداروں کو ہمارے خلاف استعمال کر رہے ہو، ہم اس کا جواب اور حساب ضرور لیں گے، ہم عمران خان کی فائنل کال پر نکلنے کیلئے تیار ہیں۔
علی امین گنڈا پور کا کہنا تھا کہ آج ہمارے پاس ایک ہی آپشن ہے کہ اپنی عزت اور غیرت نیلام کرنی ہے یا پھر لڑنا ہے کیونکہ اب ہماری عزتیں محفوظ نہیں ہیں، جو آج ہمارے ساتھ ہو رہا ہے کل جب آپ کے ساتھ ہو گا تو میں بھی دیکھوں گا، ہم ایک ہیں اور ہم نے ایک ہو کر آگے بڑھنا ہے چاہے اب ہماری جان ہی کیوں نہ چلی جائے، ہم عمران خان کو جیل سے رہا کرا کے ہی دم لیں گے۔
وزیرِ اعلٰی خیبرپختونخوا نے کہا کہ میں آپ کو عمران خان کا پیغام دے رہا ہوں، عمران خان نومبر کے مہینے میں احتجاج کی کال دینے والے ہیں، قوم تیار رہے، اسی مہینے میں عمران خان کال دیں گے اور وہ کال یہ ہو گی کہ اگر ہماری میتیں گھر نہ آئیں تو ہمارے جنازے پڑھ لینا، ہم تب تک واپس نہیں آئیں گے جب تک عمران خان کو جیل سے رہا نہیں کرا لیں گے۔
خیبرپختونخوا کے چیف منسٹر علی امین گنڈا پور نے جلسہ میں شریک پی ٹی آئی کارکنان سے ہاتھ اٹھا کر حلف لیا کہ وہ عمران خان کے ہر حکم اور فیصلے پر عملدرآمد کے پابند ہوں گے، اگر احتجاج کے دوران سب کچھ ضائع ہو جائے تب بھی مشن عمران خان کی رہائی ہو گا، فائنل کال پر نکلنے کے بعد عمران خان کی رہائی تک گھروں کو واپس نہیں جائیں گے اور حقیقی آزادی تک جدوجہد جاری رہے گی۔
