کراچی (تھرسڈے ٹائمز) — پاکستان سٹاک مارکیٹ میں تیزی کا رجحان، بینچ مارک ہنڈرڈ انڈیکس میں 4600 سے زائد پوائنٹس کا اضافہ، سٹاک ایکسچینج ایک بار پھر 114000 کی سطح عبور کر گیا۔
کاروباری ہفتہ کے پہلے روز پاکستان سٹاک مارکیٹ میں آغاز سے ہی زبردست تیزی کا رجحان برقرار رہا، بینچ مارک KSE ہنڈرڈ انڈیکس میں اب تک 4 ہزار 600 سے زائد پوائنٹس اضافہ کے ساتھ سٹاک ایکسچینج 1 لاکھ 14 ہزار کی نفسیاتی حد سے اوپر جا چکا ہے۔
گزشتہ کاروباری ہفتہ کے اختتام پر 1 لاکھ 9 ہزار 513 اعشاریہ 14 پوائنٹس پر بند ہونے والا سٹاک ایکسچینج آج مجموعی طور پر ہنڈرڈ انڈیکس میں اب تک 4 ہزار 646 اعشاریہ 66 پوائنٹس کے نمایاں اضافہ کے ساتھ 1 لاکھ 14 ہزار 159 پوائنٹس تک پہنچ گیا ہے۔
تجارتی حجم کو دیکھا جائے تو 69 کروڑ 36 لاکھ 28 ہزار 987 سے زائد حصص کا تبادلہ ہو چکا ہے جبکہ تجارتی مالیت 42 ارب 47 کروڑ 65 لاکھ 74 ہزار 184 روپے سے زائد رہی ہے۔