کراچی (تھرسڈے ٹائمز) — پاکستان سٹاک مارکیٹ میں نئے سال 2025 کا زبردست آغاز، بینچ مارک ہنڈرڈ انڈیکس میں 2100 سے زائد پوائنٹس کا اضافہ، سٹاک ایکسچینج تاریخ کی بلند ترین سطح پر پہنچ گیا۔
کاروباری ہفتہ کے تیسرے اور نئے سال 2025 کے پہلے روز پاکستان سٹاک مارکیٹ میں آغاز سے ہی زبردست تیزی کا رجحان برقرار ہے، بینچ مارک ہنڈرڈ انڈیکس میں 2195 سے زائد پوائنٹس اضافہ کے ساتھ سٹاک ایکسچینج 1 لاکھ 17 ہزار 300 کی سطح عبور کر گیا ہے۔
گزشتہ کاروباری روز یعنی سال 2024 کے آخری روز کے اختتام پر 1 لاکھ 15 ہزار 126 اعشاریہ 90 پوائنٹس پر بند ہونے والا سٹاک ایکسچینج آج مجموعی طور پر ہنڈرڈ انڈیکس میں 2 ہزار 195 اعشاریہ 11 پوائنٹس کے نمایاں اضافہ کے ساتھ 1 لاکھ 17 ہزار 322 اعشاریہ 01 پوائنٹس پر ٹریڈ کر رہا ہے۔
پاکستان سٹاک ایکسچینج میں دوسری بار 117000 کی نفسیاتی حد عبور ہوئی ہے، اس سے قبل 17 دسمبر 2024 کو سٹاک ایکسچینج نے 1 لاکھ 17 ہزار پوائنٹس کی سطح عبور کی تھی جبکہ اس کی بلند ترین سطح 1 لاکھ 17 ہزار 39 اعشاریہ 18 پوائنٹس تھی۔
آج کاروبار کے دوران اب تک کے تجارتی حجم کو دیکھا جائے تو 76 کروڑ 69 لاکھ 30 ہزار 401 سے زائد حصص کا تبادلہ ہو چکا ہے جبکہ تجارتی مالیت 33 ارب 18 کروڑ 52 لاکھ 81 ہزار 254 روپے سے زائد رہی ہے۔