اسلام آباد (تھرسڈے ٹائمز) — وزیراعظم شہباز شریف نے کہا ہے کہ سب کو مبارکباد پیش کرتا ہوں کہ دشمن مذموم مقاصد کیلئے گھات لگائے بیٹھا ہے، دشمن کے گھس بیٹھیے خیبرپختونخوا کے بعض علاقوں میں موجود ہیں، اتفاق اور اتحاد سے ملک سے دہشتگردی کا مکمل خاتمہ کرنے کا وقت آ چکا ہے، ڈیجیٹل محاذ پر پاکستان کے خلاف جو زہر اگلا جا رہا ہے وہ اگلنے والے ایجنٹ پاکستان سے باہر بیٹھے ہیں، سوشل میڈیا پر جھوٹ کا طوفان کھڑا کیا گیا ہے جس کو کاؤنٹر کرنا ضروری ہے، پاکستان کی سیکیورٹی ہماری ترجیح ہے۔
سلامتی کونسل میں پاکستان کی غیر مستقل رکنیت پر مبارکباد
نیشنل ایکشن پلان کی ایپکس کمیٹی کا اجلاس وزیراعظم شہباز شریف کی زیرِ صدارت منعقد ہوا جس سے خطاب کرتے ہوئے وزیراعظم نے کہا ہے کہ سب کو مبارکباد پیش کرتا ہوں کہ پاکستان نے سلامتی کونسل کے غیر مستقل رکن کے طور پر ذمہ داری سنبھالی ہے، پاکستان سلامتی کونسل میں اپنا بھرپور کردار ادا کرے گا، نائب وزیراعظم و وزیرِ خارجہ اسحاق ڈار نے پاکستان کے سلامتی کونسل میں انتخاب کیلئے بھرپور کوشش کیں۔
دشمن مذموم مقاصد کیلئے گھات لگائے بیٹھا ہے
وزیراعظم شہباز شریف کا کہنا تھا کہ دشمن مذموم مقاصد کیلئے گھات لگائے بیٹھا ہے، چند روز قبل سرحد پار سے کیے گئے حملے کا منہ توڑ جواب دیا گیا، دشمن کے گھس بیٹھیے خیبرپختونخوا کے بعض علاقوں میں موجود ہیں، ہمیں بخوبی علم ہے کہ بلوچستان میں پاکستان کے خلاف بُنی جانے والی سازشوں میں کون کون سے ممالک پشت پناہی کر رہے ہیں، صوبے آرمی کے ساتھ مل مربوط نظام بنائیں، وزیرِ داخلہ سے گزارش کی گئی تھی کہ صوبوں کے ساتھ مل کر پلان بنائیں۔
دہشتگردی کے مکمل خاتمہ کا وقت آ چکا ہے
وزیراعظم پاکستان نے کہا کہ پولیس کی ٹریننگ اور ٹیکنالوجی سمیت تمام معاملات اہم ہیں، دشمن کے مذموم مقاصد ناکام بنانے کیلئے پولیس کی استعداد کار میں اضافہ کیا جا رہا ہے، دہشتگردی کے خلاف جنگ میں ہمیں جدید ٹیکنالوجی سے استفادہ کرنا ہو گا، پاکستان کی ترقی و خوشحالی کا ایجنڈا اسی صورت شرمندہِ تعبیر ہو سکتا ہے جب ہم سب مل کر وفاق، چاروں صوبوں، گلگت بلتستان اور آزاد کشمیر میں امن و امان قائم کریں، اتفاق اور اتحاد سے ملک سے دہشتگردی کے مکمل خاتمہ کا وقت آ چکا ہے۔
بیرونِ ملک بیٹھے عناصر پاکستان کے خلاف پروپیگنڈا کر رہے ہیں
شہباز شریف کا کہنا تھا کہ اگر صوبے وفاق اور دفاعی اداروں کے ساتھ مل کر پاکستان کی بہتری اور خوشحالی کیلئے مربوط منصوبہ بندی کریں تو بطور وزیراعظم میری کوئی پسند و ناپسند نہیں ہے، قومی مفاد ہی پہلی ترجیح ہے اور مجھے سو فیصد یقین ہے کہ دیگر شرکاء کی بھی یہی سوچ ہے، اگر ہم اس سوچ کو عملی جامہ پہنائیں گے تو پھر کوئی مشکل ہمارے لیے مشکل نہیں رہے گی، بیرونِ ملک بیٹھے عناصر پاکستان کے خلاف پروپیگنڈا کر رہے ہیں، پاکستان کی سیکیورٹی ہماری ترجیح ہے۔
سوشل میڈیا پر جھوٹ کا طوفان کھڑا کیا گیا ہے
انہوں نے کہا کہ سوشل میڈیا پر جھوٹ کا طوفان کھڑا کیا گیا ہے، ڈیجیٹل محاذ پر پاکستان کے خلاف جو زہر اگلا جا رہا ہے وہ اگلنے والے ایجنٹ پاکستان سے باہر بیٹھے ہیں، وہ دوست نما دشمن ہیں اور جس طرح وہ سوشل میڈیا پر مہم چلا رہے ہیں وہ بذاتِ خود بہت بڑا چیلنج بن چکا ہے، یہ ایجنٹ جھوٹ کے ذریعہ حقائق کو مسخ کر رہے ہیں، اس جھوٹ اور حقائق مسخ کرنے کی بنیاد پر پاکستان خلاف بیانیہ بنایا جا رہا ہے اور عجیب سوالات اٹھائے جا رہے ہیں۔
اسلام آباد میں شہید ہونے والے رینجرز اہلکاروں کے خلاف جھوٹی خبریں گھڑی گئیں
وزیراعظم کا کہنا تھا کہ پچھلے دو چار ہفتوں میں اسلام آباد پر جو یلغار ہوئی اور اس کے نتیجہ میں سوشل میڈیا نے جھوٹ اور حقائق کو مسخ کرنے کا جو طوفان اٹھایا حالیہ وقتوں میں اس کی کوئی نظیر نہیں ملتی، اگر ہم نے اسے کاؤنٹر نہ کیا تو ہماری تمام کاوشیں دریا بُرد ہو جائیں گی، سوشل میڈیا کے حوالہ سے وفاق اور صوبوں میں کوششیں کی جا رہی ہیں، اسلام آباد پر چڑھائی کے دوران شہید ہونے والے رینجرز اہلکاروں کے خلاف جھوٹی خبریں گھڑی گئیں اور یہ وہ معاملات ہیں جن پر آج ہمیں سنجیدگی سے گفتگو کرنی ہے۔
فوج اور پولیس میں قربانیاں دینے والے سپاہی ہماری ماؤں کے سپوت ہیں
وزیراعظم پاکستان میاں شہباز شریف نے مزید کہا کہ فوج اور پولیس میں قربانیاں دینے والے سپاہی بھی ہماری ماؤں کے سپوت ہیں جو اپنے خون کا نذرانہ پیش کر رہے ہیں اور اپنے کام سے مخلص ہیں، ان کی قربانیاں رائیگاں نہیں جائیں گی اور جو لوگ ان کوششوں کو رائیگاں کرنا چاہتے ہیں وہ بہت بڑی بھول میں ہیں۔