پاکپتن (تھرسڈے ٹائمز) — وزیرِ اعلیٰ پنجاب مریم نواز شریف نے کہا ہے کہ سڑکیں بنانے سے قومیں ترقی نہیں کرتیں جیسے بیان دینے والوں کی عقل پر ماتم کرتی ہوں، سڑکیں نقل و حمل کا سب سے بڑا ذریعہ ہیں، جہاں سڑکیں بنتی ہیں وہاں ترقی آتی ہے، فٹ اینڈ ماوتھ (منہ اور پاؤں) کی بیماریاں صرف جانوروں کو نہیں انسانوں کو بھی ہوتی ہیں، ایسے لوگوں کا قدم صرف ملک کے خلاف اٹھتا ہے اور جب منہ کھلتا ہے تو گالی گلوچ اور بدتمیزی و بدتہذیبی ہوتی ہے، ہم صرف جانوروں کا نہیں بلکہ سیاسی جماعتوں کو لاحق بیماریوں کا بھی اچھا علاج کریں گے۔
فٹ اینڈ ماوتھ بیماری صرف جانوروں کو نہیں بلکہ انسانوں کو بھی ہوتی ہے، جہاں ان جیسوں کا قدم اٹھتا ہے ملک کیخلاف اٹھتا ہے اور جب منہ کھلتا ہے تو گالی گلوچ، بدتمیزی اور بدتہذیبی ہوتی ہے۔ وزیراعلیٰ پنجاب مریم نواز pic.twitter.com/XXUpSvUbZD
— The Thursday Times (@thursday_times) January 9, 2025
لائیو سٹاک کارڈ کا اجراء
لائیو سٹاک کارڈ کے اجراء کی تقریب سے خطاب کرتے ہوئے مریم نواز شریف نے کہا کہ نواز شریف دور کے بعد ایک بار پھر معیشت کیلئے اچھی خبریں آنے لگی ہیں، ملک معاشی استحکام کی طرف گامزن ہے، لائیو سٹاک سکیم حاصل کرنے والوں میں 2 خواتین بھی شامل ہیں، شہباز شریف کے وزیراعظم بنتے وقت پاکستان کے دیوالیہ ہونے کی خبریں آتی تھی، ملک کو سری لنکا سے ملایا جاتا تھا لیکن آج مسلم لیگ (ن) کی حکومت کو 10 ماہ بھی نہیں ہوئے اور سٹاک مارکیٹ کے ریکارڈز ٹوٹ رہے ہیں، سٹاک مارکیٹ سے جو خبریں آ رہی ہیں وہ اس سے پہلے نواز شریف دورِ حکومت میں آتی تھیں۔
میں نواز شریف کی بیٹی ہوں اور انھی کی طرح کام کرتی ہوں
وزیرِ اعلٰی پنجاب مریم نواز شریف نے کہا کہ میں نواز شریف کی بیٹی ہوں اور انھی کی طرح کام کرتی ہوں، پہلے جا کر اعلانات نہیں کرتی کہ میں یہ کرنے لگی ہوں بلکہ جب پراجیکٹس شروع ہونے کے بعد عوام کو ان کا ثمر ملنا شروع ہوتا ہے تب اس کی لانچنگ کرتی ہوں، عوام کو لائیو سٹاک کا ثمر ملنا شروع ہو گیا ہے اس لیے آپ کے پاس آئی ہوں، کئی حکومتیں ایسی دیکھی ہیں جو آخری وقت تک عوام کو کہتی تھیں کہ ہم کام کرنا چاہتے تھے، ہم اس چیز سے باہر نکل آئے ہیں، الحمدللّٰه اب معاشی اشاریے بہتر ہو رہے ہیں۔
معاشی اشاریے بہتر ہو رہے ہیں
مریم نواز شریف کا کہنا تھا کہ ملک میں مہنگائی کم ہوئی ہے اور استحکام نظر آ رہا ہے، زرمبادلہ کے ذخائر اور ترسیلات زر میں اضافہ ہو رہا ہے پنجاب واحد صوبہ ہے جس میں آٹے اور روٹی کی قیمتیں کم ہوئی ہیں، باقی صوبوں میں قیمتوں میں اضافہ ہوا ہے، اس حوالے سے روز اپنی ٹیم سے بحث کرتی ہوں، روٹی 15 کروڑ عوام نے کھانی ہے اس لیے قیمتوں میں اضافہ نہیں ہونے دوں گی، اب وقت ہے کہ معاشی بہتری کا ثمر عام عوام کو ملنا شروع ہو، لوگوں کے ذرائع آمدن میں اضافہ ہونا چاہیے، عوام کے پاس اتنی استطاعت ہو کہ اپنے بچوں کو تین وقت کی روٹی کھلا سکیں۔
لائیو سٹاک 20 ارب کا پروگرام ہے
پاکستان کی پہلی خاتون وزیرِ اعلٰی نے کہا کہ لائیو سٹاک کارڈ کا پروگرام میرے دل کے بہت قریب ہے جس میں اگر 10 سے کم جانور ہیں تو عوام کو فی جانور مذکورہ کارڈ کے ذریعہ 2 لاکھ 70 ہزار روپے بلا سود 4 ماہ کیلئے دیئے جائیں گے تاکہ جانوروں کی بہترین دیکھ بھال کی جاسکے، اس اقدام سے پنجاب کے عوام کی بنیادی ضروریات پوری ہوں گی، اس کی کوئی لمبی چوڑی شرائط نہیں رکھی گئیں، لائیو سٹاک 20 ارب کا پروگرام ہے جس میں 11 ارب لائیو اسٹاک کارڈ کیلئے مختص ہیں جبکہ 90 ہزار لوگوں کو یہ کارڈ دیا جائے گا اور 4 لاکھ جانوروں کیلئے کارڈ کے ذریعہ پیسے رکھے گئے ہیں۔
پاکستان میں پہلی بار جانوروں کی ٹیگنگ کا سلسلہ
وزیرِ اعلٰی پنجاب کا کہنا تھا کہ جانوروں کی نشوونما کو بہتر کرتے ہوئے اس کے گوشت کو برآمد بھی کیا جائے گا، پاکستان میں پہلی دفعہ جانوروں کی ٹیگنگ کا سلسلہ بھی شروع کیا ہے، ہر جانور کو ایک کیو آر کوڈ دیا جائے گا تاکہ مارکیٹ میں مطلوبہ ڈیمانڈ کا پتہ لگایا جا سکے اور ان کا مکمل ڈیٹا ہمارے پاس موجود ہو، میرا آفس کسانوں کو روزانہ کی بنیاد پر ہزاروں کالز کرتا ہے تاکہ ان کے مسائل سنے جا سکیں، ہر روز رات کو سونے سے قبل میں اس ڈیٹا کا جائزہ لیتی ہوں۔
نواشریف اور اس کی بیٹی جو وعدہ کرتے ہیں وہ پورا کرتے ہیں
مریم نواز شریف نے کہا کہ پنجاب میں پہلی بار کسانوں کو 400 ارب روپے کا کسان کارڈ ملا ہے، ہماری جتنی بھی سکیمز ہیں ان کیلئے لاکھوں درخواستیں موصول ہوئی ہیں جس سے لوگوں کا نواز شریف پر اعتماد ظاہر ہوتا ہے، نواشریف اور اس کی بیٹی جو وعدہ کرتے ہیں وہ پورا کرتے ہیں، آغاز میں کسانوں کو حکومت سے لڑانے کی بہت کوشش کی گئی ہے لیکن جب کسانوں کی رائے میں سنتی ہوں تو وہ بہت خوش ہیں۔
پاکستان مسلم لیگ (ن) کی راہنما اور چیف منسٹر پنجاب کا کہنا تھا کہ دہائیوں بعد پہلا سال ہے کہ کھاد بلیک میں فروخت ہوئی نہ منہ مانگی قیمتوں پر بیچی گئی، کھاد کی ایک قیمت مقرر کی گئی اور سستے داموں کسانوں کو فراہم کی گئی، بہت جلد کسانوں کیلئے ہر تحصیل میں مشینری فراہم کرنے کی سکیم لے کر آ رہے ہیں تاکہ ان کی مجبوری کو دیکھتے ہوئے منہ مانگی قیمت نہ مانگی جائے، جنوبی پنجاب کی خواتین کو مال و مویشی دینے جا رہے ہیں تاکہ افزائش بڑھے اور ان کے پاس باعزت روزگار ہو۔
فٹ اینڈ ماوتھ کی بیماریاں صرف جانوروں کو نہیں انسانوں کو بھی ہوتی ہیں
انہوں نے نام لیے بغیر سابق وزیراعظم عمران خان کو تنقید کا نشانہ بناتے ہوئے کہا کہ آج 8 ارب روپے سے زائد بجٹ میں بننے والی 4 سڑکوں کا افتتاح کرنے جا رہی ہوں، سڑکیں بنانے سے قومیں ترقی نہیں کرتیں جیسے بیان دینے والوں کی عقل پر ماتم کرتی ہوں، سڑکیں نقل و حمل کا سب سے بڑا ذریعہ ہیں، جہاں سڑکیں بنتی ہیں وہاں ترقی آتی ہے، فٹ اینڈ ماوتھ (منہ اور پاؤں) کی بیماریاں صرف جانوروں کو نہیں انسانوں کو بھی ہوتی ہیں، ایسے لوگوں کا قدم صرف ملک کے خلاف اٹھتا ہے اور جب منہ کھلتا ہے تو گالی گلوچ اور بدتمیزی و بدتہذیبی ہوتی ہے۔
پانچ سالوں میں 5 لاکھ لوگوں کو گھر دینے کا منصوبہ
وزیرِ اعلٰی پنجاب نے کہا کہ ستھرا پنجاب کا منصوبہ پورے صوبے میں فعال ہو چکا ہے، آنے والے دنوں میں مزید بہتری آئے گی، رواں سال اپنا گھر اور اپنی چھت پروگرام کے تحت ایک لاکھ لوگوں کے گھر بنائے جائیں گے جبکہ 5 سال کے اندر 5 لاکھ لوگوں کو گھر دینے کی کوشش کی جائے گی، ہمارے صوبے میں ہر شعبہ میں کام ہو رہا ہے، پچھلے دور میں کیوں کام نہیں ہوا؟ اور عوام کا پیسہ ان پر خرچ کیوں نہیں کیا گیا؟ آج نظر آ رہا ہے کہ عوام کا پیسہ ان پر لگایا جا رہا ہے، گزشتہ دور میں ایک نیا ہاسپٹل یا نیا سکول نہیں بنایا گیا، پچھلی حکومت نے 4 سال میں کام کیوں نہیں کیا؟
صرف جانوروں کا نہیں بلکہ سیاسی جماعتوں کو لاحق بیماریوں کا بھی اچھا علاج کریں گے
مریم نواز شریف کا کہنا تھا کہ ہم صرف جانوروں کا نہیں بلکہ سیاسی جماعتوں کو لاحق بیماریوں کا بھی اچھا علاج کریں گے، اگلے برس گوجرانوالہ اور فیصل آباد میں نئی میٹرو بسز بننے جارہی ہیں، الیکٹرک بسز لائی جا رہی ہیں، یہ پنجاب میں جو آج پیسہ خرچ ہو رہا ہے وہ عوام کا پیسہ ہے، آج جب لوگوں کے گھر بن رہے ہیں اور لائیو سٹاک کارڈ اور طلباء کو سکالرشپس دی جا رہی ہیں تو نظر آ رہا ہے کہ عوام پر پیسے خرچ ہو رہے ہیں۔