اسلام آباد (تھرسڈے ٹائمز) — پاکستانی وزیراطلاعات عطا اللہ تارڑ نے رات گئے سرکاری میڈیا پر بیان دیتے ہوئے کہا ہے کہ پاکستان کے پاس مستند انٹیلیجنس اطلاعات موجود ہیں کہ بھارت اگلے 24 سے 36 گھنٹوں میں پہلگام واقعے سے جڑے بے بنیاد اور خودساختہ الزامات کو بنیاد بنا کر پاکستان کے خلاف فوجی کارروائی کا ارادہ رکھتا ہے۔
وزیراطلاعات نے کہا کہ پاکستان اس بات کا واضح اعادہ کرتا ہے کہ بھارت کی کسی بھی فوجی مہم جوئی کا فوری، یقینی اور فیصلہ کن جواب دیا جائے گا۔ انہوں نے مزید کہا کہ پاکستانی قوم اپنی خودمختاری اور علاقائی سالمیت کا ہر قیمت پر دفاع کرے گی۔
دوسری جانب پاکستان کے وزیردفاع خواجہ محمد آصف نے بھی خبردار کیا ہے کہ بھارت کی جانب سے کسی ممکنہ فوجی کارروائی کے خطرات بڑھ رہے ہیں اور پاکستان کی مسلح افواج ہر قسم کی جارحیت کا بھرپور جواب دینے کے لیے تیار ہیں۔
امریکی محکمہ خارجہ نے بھی دونوں ممالک پر زور دیا ہے کہ وہ کشیدگی کو مزید بڑھانے سے گریز کریں۔ امریکی سیکریٹری خارجہ مارکو روبیو آج یا کل پاکستانی اور بھارتی وزرائے خارجہ سے بات چیت کرنے کا ارادہ رکھتے ہیں تاکہ خطے میں ذمہ دارانہ حل کی راہ ہموار کی جا سکے۔
عالمی برادری صورتحال پر گہری نظر رکھے ہوئے ہے اور دونوں ممالک سے مطالبہ کر رہی ہے کہ وہ تحمل اور مذاکرات کا راستہ اختیار کریں تاکہ کسی ممکنہ تصادم کو روکا جا سکے۔∎
