اسلام آباد (تھرسڈے ٹائمز) — سینیٹ میں اپوزیشن لیڈر شبلی فراز نے کہا ہے کہ جنگ کے دوران اپنا بہترین ہتھیار استعمال کیا جاتا ہے اور ہمارا بہترین ہتھیار عمران خان ہے اسے استعمال کیا جائے، تحریکِ انصاف (پی ٹی آئی) اور عمران خان کی اقوامِ عالم میں بہت پذیرائی ہے۔
جنگ میں اپنا سب سے بہترین ہتھیار استعمال کیا جاتا ہے۔ ہمارا سب سے بہترین ہتھیار عمران خان ہے، اسے استعمال کیا جائے۔
سینیٹر شبلی فراز pic.twitter.com/80AVPbNN8H— The Thursday Times (@thursday_times) May 19, 2025
پاکستان کی پارلیمنٹ کے ایوانِ بالا کے اجلاس میں اظہارِ خیال کرتے ہوئے سینیٹر شبلی فراز نے کہا ہے کہ حکومت نے ایک کمیٹی تشکیل دی ہے جس کا مقصد پاکستان کا نقطہِ نظر عالمی دنیا کو بتانا ہے، حکومت کا بیرونِ ملک وفود بھیجنے کا فیصلہ بڑی اچھی بات ہے لیکن بدقسمتی سے اس کمیٹی میں پی ٹی آئی سمیت اپوزیشن کا کوئی بھی رکن شامل نہیں کیا گیا۔
سینیٹر شبلی فراز کا کہنا تھا کہ حکومت نے بڑی تنگ نظری کا مظاہرہ کیا ہے، اپوزیشن کو اس کمیٹی میں شامل نہ کرنا افسوسناک ہے، بھارتی حکومت نے کمیٹی میں کانگریس کے نمائندوں کو بھی شامل کیا مگر یہاں آپ نے جو کمیٹی بنائی وہ سب غیر قانونی طریقہ سے منتخب ہو کر آئے ہیں، یہ لوگ باہر جا کر پاکستان کا مقدمہ کیا لڑیں گے؟
انہوں نے کہا کہ ایوان کی سب سے بڑی اپوزیشن پارٹی کا کمیٹی میں نام شامل نہیں کیا گیا، پاکستان کی خدمت کیلئے اپوزیشن اپنی کمیٹی بنا کر اپنے نمائندے اپنے خرچ پر بیرونِ ملک بھیجے گی، بھارت سے ہمیں بھی خطرہ ہے اور اب حکومت اپنے چکر میں لگ گئی ہے، حکومت سے گزارش ہے کہ اپوزیشن اپنے جو نمائندے باہر بھیجے ان کے نام ای سی ایل میں نہ ڈالے جائیں۔
راہنما تحریکِ انصاف (پی ٹی آئی) سینیٹر شبلی فراز نے کہا کہ قومی مسئلہ پر اپوزیشن کو دیوار کے ساتھ لگا دیا گیا، بھارت نے پاکستان کے مفادات پر حملے کئے، بھارتی حملے کے بعد پوری قوم پاکستان کیلئے کھڑی ہو گئی، آپ نے اس اتحاد کو برقرار رکھنا ہے، اب بھی خطرات موجود ہیں۔
شبلی فراز نے اڈیالہ جیل راولپنڈی میں قید سابق وزیراعظم عمران خان کا ذکر کرتے ہوئے کہا کہ تحریکِ انصاف (پی ٹی آئی) اور عمران خان کی اقوامِ عالم میں بہت پذیرائی ہے، جنگ کے دوران اپنا بہترین ہتھیار استعمال کیا جاتا ہے اور ہمارا بہترین ہتھیار عمران خان ہے اسے استعمال کیا جائے۔