لاہور (تھرسڈے ٹائمز) — مریم نواز شریف نے کہا ہے کہ پی ٹی نے قیدی نمبر 804 کے نام پر الیکشن لڑا اور ہار گئی، یہ ضمنی انتخاب نہیں بلکہ ریفرینڈم تھا جو مسلم لیگ (ن) نے جیت لیا، الیکشن بیانیہ سے نہیں بلکہ کارکردگی سے جیتا جاتا ہے۔
وزیرِ اعلیٰ پنجاب مریم نواز شریف نے لاہور میں صوبائی وزراء اور سیکرٹریز کے اجلاس سے خطاب کرتے ہوئے کہا ہے کہ خیبرپختونخوا میں کرپشن کے ڈھیر لگ گئے ہیں، پشاور میں ترقی کا کوئی نام و نشان نہیں ہے، اسی وجہ سے ہری پور کی نشست نواز شریف کے نام رہی، یہ ضمنی انتخاب نہیں بلکہ ریفرینڈم تھا جو مسلم لیگ (ن) نے جیت لیا۔
پرفارمنس سے بہتر کوئی بیانیہ نہیں ہوسکتا۔ تمام ضمنی الیکشن میں کامیابی میرے لیے، پنجاب کیلئے اور پاکستان کے عوام کیلئے خوش آئین بات ہے کہ جس مصنوعی بت کو بنا کر طاقت دی گئی تھی، اللہ تعالیٰ نے اسے آج پاش پاش کر دیا۔ جب بیانیہ کو سب کچھ سمجھ لیا گیا اور اصل کام کو پس پشت ڈال دیا… pic.twitter.com/dkhXByXj62
— The Thursday Times (@thursday_times) November 24, 2025
مریم نواز شریف کا کہنا تھا کہ آج فیض حمید ہے نہ وہ ججز ہیں جو پی ٹی آئی (پاکستان تحریکِ انصاف) کو جتواتے تھے، انہوں نے قیدی نمبر 804 کے نام پر الیکشن لڑا اور ہار گئے، مقبولیت کے دعوے زمین بوس ہو گئے، الیکشن کا بائیکاٹ صرف ہار کے ڈر سے کیا جاتا ہے، الیکشن کا بائیکاٹ کر کے بھی پی ٹی آئی نے امیدوار کھڑے کیے۔
انہوں نے ضمنی الیکشن میں کامیاب ہونے والے امیدواروں کو مبارکباد پیش کرتے ہوئے ہوئے کہا کہ میاں نواز شریف اور میں نے جیل کاٹی مگر الیکشن کا بائیکاٹ نہیں کیا، کبھی ہار نہیں مانی، اُس وقت بھی الیکشن لڑے جب ریاست کی پوری مشینری مسلم لیگ (ن) کے خلاف تھی، ملکی ترقی کو 2018 میں ڈی ریل کیا گیا۔
وزیرِ اعلیٰ پنجاب مریم نواز شریف نے مزید کہا کہ عوام نے مسلم لیگ (ن) کے حق میں فیصلہ دیا ہے، مسلم لیگ (ن) نے 2018 میں چھینی گئی نشستیں واپس لے لی ہیں، الیکشن بیانیہ سے نہیں بلکہ کارکردگی سے جیتا جاتا ہے اور کارکردگی سے بہتر کوئی بیانیہ نہیں ہو سکتا۔
