اسلام آباد (تھرسڈے ٹائمز) — چیف آف ڈیفینس فورسز فیلڈ مارشل عاصم منیر نے کہا ہے کہ معرکہِ حق میں اللّٰه کی مدد و نصرت سے فتح حاصل ہوئی، دہشتگردی پاکستان کا نہیں بلکہ ہندوستان کا وطیرہ ہے، ہم دشمن کو چھپ کر نہیں بلکہ للکار کر مارتے ہیں۔
پاکستان کے چیف آف ڈیفینس فورسز فیلڈ مارشل عاصم منیر نے قومی علماء و مشائخ کانفرنس سے خطاب کرتے ہوئے کہا ہے کہ ریاستِ طیبہ اور ریاستِ پاکستان کا آپس میں گہرا تعلق ہے، سعودی عرب اور پاکستان کے مابین دفاعی معاہدہ تاریخی ہے۔
فیلڈ مارشل عاصم منیر کا کہنا تھا کہ اللّٰه تعالیٰ نے تمام مسلم ممالک میں سے حفاظتِ حرمین کا شرف پاکستان کو عطا فرمایا ہے، عزت اور طاقت تقسیم سے نہیں بلکہ محنت اور علم سے حاصل ہوتی ہے، علماء قوم کو متحد رکھیں اور قوم کی نظر میں وسعت پیدا کریں۔
قومی علماء و مشائخ کانفرنس سے خطاب کرتے ہوئے انہوں نے کہا کہ جس قوم نے علم اور قلم کو چھوڑا وہاں انتشار اور فساد فی الارض نے جگہ لی، اسلامی ریاست میں ریاست کے علاوہ کوئی جہاد کا حکم نہیں دے سکتا۔
چیف آف ڈیفینس فورسز فیلڈ مارشل عاصم منیر نے مزید کہا کہ معرکہِ حق میں اللّٰه کی مدد و نصرت سے فتح حاصل ہوئی، دہشتگردی پاکستان کا نہیں بلکہ ہندوستان کا وطیرہ ہے، ہم دشمن کو چھپ کر نہیں بلکہ للکار کر مارتے ہیں۔
