کراچی (تھرسڈے ٹائمز) — پاکستان سٹاک مارکیٹ میں ریکارڈ ساز دن، سٹاک ایکسچینج 1 لاکھ 74 ہزار پوائنٹس کی نفسیاتی حد عبور کر کے تاریخ کی نئی بلند ترین سطح پر پہنچ گیا۔
کاروباری ہفتہ کے پہلے روز پاکستان سٹاک مارکیٹ میں آغاز سے ہی زبردست تیزی کا رجحان نظر آیا، بینچ مارک KSE ہنڈرڈ انڈیکس میں 2 ہزار سے زائد پوائنٹس اضافہ کے ساتھ سٹاک ایکسچینج 1 لاکھ 74 ہزار 400 پوائنٹس کی تاریخی سطح عبور کر گیا ہے۔
گزشتہ کاروباری ہفتہ کے اختتام پر 1 لاکھ 72 ہزار 400 اعشاریہ 73 پوائنٹس پر بند ہونے والا سٹاک ایکسچینج آج مجموعی طور پر ہنڈرڈ انڈیکس میں 2 ہزار 10 اعشاریہ 99 پوائنٹس کے اضافہ کے ساتھ 1 لاکھ 74 ہزار 411 اعشاریہ 72 پوائنٹس کی بلند ترین سطح تک پہنچ گیا۔
آج کاروبار کے دوران اب تک کے تجارتی حجم کو دیکھا جائے تو 39 کروڑ 24 لاکھ 52 ہزار 674 سے زائد حصص کا تبادلہ ہو چکا ہے جبکہ تجارتی مالیت 21 ارب 94 کروڑ 9 لاکھ 54 ہزار 603 روپے سے زائد رہی ہے۔
