حیدرآباد (دی تھرسڈے ٹائمز) — کانگریس کے رکنِ پارلیمنٹ ششی تھرور کے مطابق بھارت نے حیدرآباد میں کانگریس کی حمایت یافتہ ایک سمٹ میں مدعو 315 مقررین میں سے 115 کو ملک میں داخل ہونے سے روک دیا ہے، جس سے اپوزیشن جماعت اور وزیرِ اعظم نریندر مودی کی حکومت کے درمیان ایک نیا تنازع کھڑا ہو گیا ہے۔
بھارتی وزارتِ خارجہ نے نہ تو اس تعداد کی تردید کی اور نہ ہی ان فیصلوں کی وضاحت کی۔ وزارت کے ترجمان رندھیر جیسوال نے ویزوں کی منسوخی کے بارے میں سوال پر کہا، ”ویزا کے معاملات کسی بھی ملک یا کسی بھی حکومت کے خودمختار اختیارات ہیں۔“ وزارتِ داخلہ کی جانب سے فوری طور پر کوئی جواب نہیں آیا۔
دو روزہ بھارت سمٹ، جس کا یہ دوسرا ایڈیشن ہے، جمعہ کو شروع ہوئی اور ہفتے کو ختم ہو رہی ہے۔ توقع تھی کہ بھارت اور 70 دیگر ممالک سے تقریباً ایک ہزار شرکا موسمیاتی تبدیلی، انفراسٹرکچر، اور سرمایہ کاری پر بات کریں گے۔ تلنگانہ کی کانگریس حکومت اسے دسمبر میں حیدرآباد میں ہونے والی انویسٹ تلنگانہ گلوبل سمٹ کا پیش خیمہ قرار دیتی ہے۔
وزیرِ اعلیٰ اے ریونت ریڈی نے ایک نیوز کانفرنس میں کہا کہ وزارتِ خارجہ اور وزارتِ داخلہ نے مودی پر سوال اٹھانے والوں کو باہر رکھا، تاہم انہوں نے یہ نہیں بتایا کہ ایسے افراد کتنے ہیں۔ انہوں نے کہا، ”مجھے سمجھ نہیں آتا کہ بی جے پی اپوزیشن کی متنوع آوازوں سے کیوں پریشان ہے۔ نریندر مودی سمجھتے ہیں کہ وہ ایک آمر ہیں جو ہر آواز کو دبا سکتے ہیں۔“
تھرور نے ویزوں کی منسوخی کی قانونی بنیاد پر سوال اٹھایا اور کہا کہ یہ فیصلے اتنی تاخیر سے آئے کہ سمٹ ختم ہونے سے پہلے ان میں سے کوئی بھی واپس نہیں لیا جا سکتا تھا۔ انہوں نے لکھا، ”کیسی شرم کی بات ہے کہ ایک قابلِ فخر جمہوریت اتنی غیر محفوظ ہو گئی ہے کہ اسے ہر اس آواز کو دبانا پڑتا ہے جس کے تنقیدی ہونے کا اسے خدشہ ہو۔“ کانگریس کے ایک اور رکنِ پارلیمنٹ چمالا کرن کمار ریڈی نے کہا کہ تقریباً 30 فیصد مدعوین ویزا مسائل کی وجہ سے سفر نہیں کر سکے۔
ان میں ہیلے لِنگ بھی شامل ہیں، ناروے کی وہ صحافی جنہوں نے مئی میں اوسلو میں آزادیٔ صحافت پر مودی سے سوال کیا تھا۔ انہیں ہفتے کو میڈیا کے مستقبل پر بات کرنی تھی، لیکن ان کا کہنا ہے کہ ناروے میں بھارتی سفارت خانے نے انہیں بتایا کہ ویزا اور سیاسی کلیئرنس ہونے کے باوجود وہ سفر نہیں کر سکتیں، کیونکہ وزارتِ داخلہ میں ”اوپر سے احکامات“ آئے ہیں۔
بی جے پی نے اس تقریب پر شدید تنقید کی ہے۔ تلنگانہ میں پارٹی کے سینئر رہنما اور مرکزی وزیر جی کشن ریڈی نے کہا کہ اس سمٹ کا مقصد بھارت پر تنقید کرنے والی قوتوں کو اکٹھا کرنا تھا۔ پارٹی کے ریاستی صدر این رام چندر راؤ نے اسے ”بھارت مخالف سمٹ“ قرار دیا اور سوال کیا کہ ریاستی حکومت پیسوں کی کمی کے باوجود اس پر کروڑوں روپے کیوں خرچ کر رہی ہے۔ انہوں نے ریونت ریڈی پر راہل گاندھی کو خوش کرنے کے لیے ”بھارت مخالف قوتوں“ کی سرپرستی کا الزام لگایا۔
ریونت ریڈی کے مطابق لوک سبھا میں قائدِ حزبِ اختلاف راہل گاندھی ہفتے کو سمٹ سے خطاب کریں گے اور گِگ اور پلیٹ فارم ورکرز کے لیے تلنگانہ کی پالیسی کا اجرا کریں گے۔ انہوں نے سوال کیا، ”اس میں کیا غلط ہے؟“ ان کے ساتھ موجود سابق مرکزی وزیر سلمان خورشید نے کہا کہ منتظمین چاہتے ہیں کہ حیدرآباد ڈیووس کی طرح عالمی مباحثے کا مرکز بنے۔
