نامور صحافی عمر چیمہ نے ساتھی صحافی اعزاز سید دے نال اپنے پروگرام وچ ایہ دعویٰ کیتا اے کہ فوج نوں بطور ادارہ درپیش چیلنجز دی وجہ ایہ اے کہ قیادت تے ماتحت ملازمین دی سوچ وچ اختلاف اے، لاہور دے کور کمانڈر اپنی قیادت دے برعکس عمران خان دی حمایت کردے نیں تے انہاں نے خود تحریکِ انصاف دے کارکناں نوں کور کمانڈر ہاؤس وچ داخل ہون دتا پر شاید اوہ ایہ نہیں جاندے کہ عمران خان اپنے ٹارگٹس دے حصول لئی ایہ نہیں ویکھدے کہ سامنے کھلوتا بندہ اوس نال محبت رکھدا اے یا نفرت کردا اے۔
عمر چیمہ دا آکھنا سی کہ لاہور دے کور کمانڈر نے تحریکِ انصاف دے کارکناں نوں اندر تے داخل ہون دتا پر اوس توں بعد معاملات نوں قابو نہ کر سکے، کور کمانڈر نے سیکیورٹی سٹاف نوں سویلین کپڑے پانون دی تلقین کیتی تے فیر سامان چک کے اہلِ خانہ دے نال دوجے راستے توں نکل گئے۔
انہاں دا مزید آکھنا سی کہ کور کمانڈر نوں اپنے عہدے دی اہمیت دا خیال رکھنا چاہیدا سی، انہاں نے ادارے دے وقار نوں مجروح کیتا۔ مظاہرین نے عمارت نوں نقصان پہنچایا تے فوجی گڈیاں دی وی توڑ پھوڑ کیتی۔
