نامور صحافي عمر چيمه پنهنجي پروگرام ۾ ساٿي صحافي اعزاز سيد سان گڏجي اهو دعويٰ ڪيو آهي ته فوج کي هڪ اداري جي حيثيت ۾ جيڪي چئلينج درپيش آهن، تن جو سبب اهو آهي ته قيادت ۽ هيٺين ملازمن جي سوچ ۾ اختلاف آهي، لاهور جو ڪور ڪمانڊر پنهنجي قيادت جي برخلاف عمران خان جي حمايت ڪري ٿو ۽ هن پاڻ تحريڪ انصاف جي ڪارڪنن کي ڪور ڪمانڊر هائوس ۾ داخل ٿيڻ ڏنو، پر شايد هو اهو نٿو ڄاڻي ته عمران خان پنهنجن ٽارگيٽس جي حاصلات لاءِ اهو نٿو ڏسي ته سامهون بيٺل شخص کانئس محبت ڪري ٿو يا نفرت.
عمر چيمه جو چوڻ هو ته لاهور جي ڪور ڪمانڊر تحريڪ انصاف جي ڪارڪنن کي اندر ته اچڻ ڏنو، پر ان کان پوءِ معاملن کي قابو نه ڪري سگهيو، ڪور ڪمانڊر سيڪيورٽي اسٽاف کي سول ڪپڙا پائڻ جي تلقين ڪئي ۽ پوءِ سامان کڻي گھروارن سان گڏ ٻئي رستي کان نڪري ويو.
هن وڌيڪ چيو ته ڪور ڪمانڊر کي پنهنجي عهدي جي اهميت جو خيال رکڻ گهرجي ها، هن اداري جي وقار کي مجروح ڪيو. مظاهرين عمارت کي نقصان پهچايو ۽ فوجي گاڏين کي به ڀڃ ڀاڻ جو نشانو بڻايو.
