لاہور (تھرسڈے ٹائمز) – پاکستان مسلم لیگ (ن) کے سپریم لیڈر میاں نواز شریف سے پاکستان میں تعینات امریکی سفیر ڈونلڈ بلوم کی ملاقات، میاں نواز شریف نے فلسطین پر اسرائیلی جارحیت کو روکنے اور غزہ میں فی الفور جنگ بندی پر زور دیا۔
میاں نواز شریف نے امریکی سفیر ڈونلڈ بلوم سے ملاقات میں اسرائیل کی بلاامتیاز بمباری کے نتیجہ میں مظلوم فلسطینیوں کی سفاکانہ شہادتوں کا مسئلہ اٹھایا اور غزہ میں فوری جنگ بندی پر زور دیا، میاں نواز شریف کی جانب سے فلسطینیوں کے قتلِ عام کا سلسلہ فوری طور پر روکنے اور متاثرہ عوام کو فی الفور طبی و انسانی امداد کی فراہمی پر زور دیا گیا۔
ملاقات میں باہمی تعاون اور دوطرفہ تعلقات کی اہمیت پر بھی گفتگو کی گئی، میاں نواز شریف نے خاص طور پر امریکی راہنماؤں سے اپنی ملاقاتوں کا حوالہ دیتے ہوئے کہا کہ تمام امریکی راہنما پاکستان اور امریکہ کے درمیان تعلقات کی اہمیت کو تسلیم کرتے ہیں۔
میاں نواز شریف اور ڈونلڈ بلوم کے درمیان پاکستان کی سیاسی و معاشی صورتحال بالخصوص عام انتخابات کی تیاریوں کے حوالہ سے تبادلہ خیال کیا گیا، پاکستان میں تعینات امریکی سفیر ڈونلڈ بلوم نے اس اعتماد کا بھی اظہار کیا کہ آج پاکستان کو درپیش مسائل اور بحرانوں سے نکالنے کیلئے ملک کے عوام ایک بار پھر مسلم لیگ (ن) پر بھرپور اعتماد کرتے ہوئے قائدانہ کردار سونپیں گے۔
دونوں راہنماؤں نے پاکستان اور امریکہ کے درمیان دوطرفہ تعلقات اور مختلف شعبوں میں تعاون پر گفتگو کی، دونوں ممالک کے درمیان پختہ اور مستحکم شراکت داری کی اہمیت کا بھی اعتراف کیا گیا جبکہ تجارت، معیشت، موسمیاتی تغیر، سلامتی اور علاقائی استحکام سمیت دو طرفہ دلچسپی کے مختلف موضوعات پر بھی بات چیت کی گئی۔
امریکی سفیر ڈونلڈ بلوم کی جانب سے ملاقات کے دوران خوشگوار اور کھلے انداز میں گفتگو پر میاں نواز شریف کا شکریہ بھی ادا کیا گیا۔
