اسلام آباد (تھرسڈے ٹائمز) — پاکستان مسلم لیگ (ن) کے صدر اور سابق وزیراعظم میاں شہباز شریف نے نجی نیوز چینل کو انٹرویو دیتے ہوئے کہا ہے کہ وزارتِ عظمٰی کیلئے مسلم لیگ (ن) کے امیدوار میاں نواز شریف ہیں، اگر اللّٰه تعالیٰ نے موقع دیا تو نواز شریف چوتھی مرتبہ پاکستان کے وزیراعظم منتخب ہوں گے۔
میاں شہباز شریف نے کہا ہے کہ مسلم لیگ (ن) کا بیانیہ ترقی و خوشحالی ہے اور یہ بیانیہ وقت کی اہم ترین ضرورت ہے، نواز شریف نے تمام تر دھمکیوں کا مقابلہ کیا اور پاکستان کو ایٹمی طاقت بنایا، نواز شریف نے پاکستان کو سی پیک کا تحفہ دیا، پبلک ٹرانسپورٹ میں نواز شریف نے میٹرو بس، اورنج لائن ٹرین اور گرین لائن جیسے منصوبے دیئے، پاکستان میں صحت و تعلیم کے شعبوں میں ترقی نواز شریف کے دور میں ہوئی۔
صدر مسلم لیگ (ن) کے صدر کا کہنا تھا اپریل 2022 میں مرکز میں 13 جماعتوں کی اتحادی حکومت تھی، بطور وزیراعظم میرے لیے سب سے بڑا چیلنج پاکستان کو دیوالیہ ہونے سے بچانا تھا اور اس کیلئے ہماری حکومت اور وزیرِ خزانہ نے دن رات بہت محنت سے کام کیا، اگر خدانخواستہ پاکستان دیوالیہ ہو جاتا تو پاکستان میں ادویات نہ مل سکتیں، ملک میں خوراک، گیس اور پیٹرول کی قلت ہو جاتی، زراعت ختم ہو جاتی اور لاکھوں لوگ بےروزگار ہو جاتے۔
سابق وزیراعظم نے کہا کہ سب سے زیادہ تعلیمی وظائف نواز شریف کے دور میں دیئے گئے، پاکستان میں پہلی انفارمیشن ٹیکنالوجی اور ٹیکنیکل یونیورسٹی بھی نواز شریف کے دور میں بنی، نواز شریف کے دور میں ہی دانش سکولز بنائے گئے جو ایچی سن کے ہم پلہ ہیں، نواز شریف کے دور میں ہاسپٹلز میں مفت ادویات ملتی تھیں، نالج پارک کا عملی اقدام اور پی کے ایل ائی کا قیام بھی نواز شریف کے دور میں ہوا۔
میاں شہباز شریف کا کہنا تھا کہ نواز شریف کے دور میں گوادر پورٹ کے منصوبے لگے، بلوچستان میں سڑکوں کا جال بچھایا گیا، کراچی میں کے تھری اور کے فور جیسے پانی کے منصوبے لگائے گئے، گرین لائن پراجیکٹ بنا، حیدرآباد کراچی موٹروے بنی، پشاور کو موٹروے سے منسلک کیا گیا اور دیامیر بھاشا ڈیم کی فنڈنگ ہوئی۔
انہوں نے کہا کہ جب 2017 میں نواز شریف کی حکومت کا تختہ الٹا گیا تو پاکستان کی ترقی کا سفر وہیں رک گیا جبکہ ثاقب نثار اس کا سب سے بڑا مہرہ تھا، جو ہائبرڈ سسٹم لایا گیا اس نے پاکستان میں تباہی مچا دی، اگر اللّٰه تعالٰی کے فضل و کرم سے پاکستان مسلم لیگ (ن) کو دوبارہ موقع ملا تو ترقی کا سفر وہیں سے شروع کیا جائے گا۔
مسلم لیگ (ن) کے صدر کا کہنا تھا کہ میاں محمد نواز شریف نے اپنا معاملہ اللّٰه پر چھوڑ دیا تھا اور پھر سب نے دیکھا کہ کیسے دودھ کا دودھ اور پانی کا پانی ہو رہا ہے، پاناما پیپرز میں نواز شریف کے نام تک نہیں تھا مگر نواز شریف کے خلاف ایک جھوٹا کیس بنا کر اقامہ میں ایک ہھونڈے طریقہ سے سزا دلائی گئی اور پاکستان کی ترقی و خوشحالی کا راستہ روک دیا گیا۔
میاں شہباز شریف نے کہا کہ نواز شریف کا قصور پاکستان میں سی پیک لانا تھا، نواز شریف کا قصور پاکستان کو ایٹمی طاقت بنانا تھا، نواز شریف کا قصور پاکستان میں موٹرویز اور سڑکوں کا جال بچھانا تھا، وزارتِ عظمٰی کیلئے مسلم لیگ (ن) کے امیدوار میاں نواز شریف ہیں، اگر اللّٰه تعالیٰ نے موقع دیا تو نواز شریف چوتھی مرتبہ پاکستان کے وزیراعظم منتخب ہوں گے۔
سابق وزیراعظم کا کہنا تھا کہ 9 مئی کی سازش میں صرف عمران خان نہیں بلکہ فوج اور عدلیہ میں موجود اس کے کچھ حواری بھی شامل تھے، یہ واقعہ پاکستان سے بہت بڑی غداری تھی اور اس کا سرغنہ عمران نیازی تھا، عمران خان نے پاکستان، فوج اور جنرل عاصم منیر کے خلاف سازش رچائی تھی۔
انہوں نے کہا کہ مجھے پوری امید ہے کہ آئندہ انتخابات میں پاکستان مسلم لیگ (ن) کو سادہ اکثریت مل جائے گی، ہم بھرپور مشاورت کے ساتھ کام پاکستان کے عوام کو سستی روٹی، روزگار، ادویات اور تعلیم کی سہولیات فراہم کرنے کی کوشش کر رہے ہیں، نواز شریف اس مشن کیلئے دن رات کام کر رہے ہیں۔
میاں شہباز شریف کا کہنا تھا کہ نواز شریف سے زیادہ تجربہ کار کوئی اور سیاستدان پاکستان میں موجود نہیں ہے، پورے پاکستان کو میرا پیغام ہے کہ 8 فروری کو آپ نے اپنے ووٹ سے پاکستان کی قسمت کا فیصلہ کرنا ہے، آپ اس لیڈر اور جماعت کا انتخاب کریں جس کے بارے میں ماضی پکار پکار کر گواہی دیتا ہے کہ اس کو جب بھی موقع ملا اس نے قوم کی ہر ممکن خدمت کی۔
