اسلام آباد (تھرسڈے ٹائمز) — پاکستان مسلم لیگ (ن) کے صدر میاں شہباز شریف نے وزیراعظم منتخب ہونے کے بعد قومی اسمبلی میں قائدِ ایوان کی حیثیت سے اپنے پہلے خطاب میں کہا ہے کہ میرے قائد نواز شریف ہیں، نواز شریف کو اس بات کی سزا دی گئی کہ انہوں نے پورے ملک میں ترقی و خوشحالی کے مینار تعمیر کیے، سانحہ 9 مئی کے مجرم ہر صورت قانون کا سامنا کریں گے، جنہوں نے نو مئی کو قوم کے ساتھ غداری اور قوم کے شہداء کی بےحرمتی کی ان کیلئے انصاف اور قانون اپنا راستہ بنائے گا۔
نو منتخب وزیراعظم میاں شہباز شریف نے کہا ہے کہ میرے قائد تین مرتبہ وزیراعظم منتخب ہونے والے میاں نواز شریف ہیں جو معمارِ پاکستان ہیں ان کی قیادت میں پاکستان کے اندر ترقی و خوشحالی کے جو انقلاب آئے وہ اپنی مثال آپ ہیں، میاں نواز شریف کو اس بات کی سزا دی گئی کہ انہوں نے پورے ملک میں ترقی و خوشحالی کے مینار تعمیر کیے اور تمام عوامی منصوبوں پر انکے نام کی تختیاں لگی ہوئی تھیں۔
میاں شہباز شریف کا کہنا تھا کہ کچھ قوتوں کو میاں نواز شریف کی پاکستان کیلئے خدمات راس نہ آئیں اور انہوں نے تین مرتبہ نواز شریف کی حکومت کا تختہ الٹا، نواز شریف کو سلاخوں کے پیچھے بھجوایا اور نواز شریف کو جلاوطنیوں پر مجبور کیا گیا لیکن نواز شریف نے کبھی پاکستان کے مفاد کے خلاف بات کرنے کا کبھی سوچا تک نہیں ہے،
قومی اسمبلی میں 201 ووٹس حاصل کر کے دوسری بار پاکستان کے وزیراعظم منتخب ہونے والے میاں شہباز شریف نے کہا کہ جو لوگ شور شرابہ سے میری آواز گم کرنا چاہتے ہیں وہ سن لیں کہ ان کا اپنا شور شرابہ گم ہو جائے گا اور میری آواز انشاءاللّٰه بلند ہوتی رہے گی، جو لوگ آج یہاں شور مچا رہے ہیں یہی لوگ کبھی دن رات جنگلہ بس کا شور مچا کر جھوٹ کا طوفان کھڑا کیا کرتے تھے اور پھر وہی جنگلہ بس انہوں نے خود پشاور میں بنائی اور کرپشن کے تاریخی ریکارڈز قائم کیے گئے۔
انہوں نے سانحہ 9 مئی کا ذکر کرتے ہوئے کہا کہ ستم ظریفی ہے کہ نو مئی کو قوم نے وہ دل خراش مناظر بھی دیکھے جب ریاست پاکستان اور اس کے اداروں پر حملے کیے گئے، کیا ایسا لیڈر اور ایسا جتھا قابلِ معافی ہے؟ اس کا فیصلہ اس ایوان نے کرنا ہے، سانحہ 9 مئی کے مجرم ہر صورت قانون کا سامنا کریں گے، جنہوں نے نو مئی کو قوم کے ساتھ غداری اور قوم کے شہداء کی بےحرمتی کی، ان کیلئے انصاف اور قانون اپنا راستہ بنائے گا جبکہ وہ لوگ جو اس جرم میں شامل نہیں ان کو کوئی گزند نہیں پہنچے گی۔
نو منتخب وزیراعظم میاں شہباز شریف کا کہنا تھا کہ ہمیں امریکہ سمیت یورپی یونین، خلیجی تعاون کونسل اور دیگر ممالک کے ساتھ اپنے تعلقات کو ازسرِنو استوار کرنا ہے اور پھر ان میں بہتری بھی لانی ہے، پاکستان کا جی 20 میں شمولیت کا ہدف 2030 ہے اور اس کیلئے ہم بہت زیادہ محنت کریں گے، خارجہ پالیسی میں ہم کسی گریٹ گیم کے حصہ دار نہیں ہوں گے، ہم اپنی خارجہ پالیسی اس رخ پر استوار کریں گے کہ ہم دوستوں میں اضافہ اور دشمنوں میں کمی کریں گے۔
فلسطین اور کشمیر کا ذکر کرتے ہوئے میاں شہباز شریف کا کہنا تھا کہ ڈنکے کی چوٹ کر کہتا ہوں کہ غزہ و فلسطین اور کشمیر میں قتل و غارت کا ایسا بازار گرم ہے جو دنیا نے اس سے پہلے کبھی نہیں دیکھا، اسرائیل کی جانب سے بدترین بمباری اور ظلم و تشدد کی انتہا کر دی گئی ہے، کشمیر میں بدترین ظلم ڈھایا جارہا ہے لیکن دنیا کا کوئی ادارہ اس کو روک نہیں سکا، جو مقامِ عبرت اور مقامِ افسوس بھی ہے کہ تمام عالمی برادری محوِ تماشائی اور خاموش ہے لیکن ایسٹ تیمور سوڈان کی بات آتی ہے تو مذہبی بنیادوں پر بزورِ بازو وہاں نئے ممالک بنوا دیئے جاتے ہیں۔
تحریکِ انصاف کی جانب سے انٹرنیشنل مانیٹری فنڈ (آئی ایم ایف) کو لکھے گئے خط کے حوالہ سے بات کرتے ہوئے میاں شہباز شریف نے کہا کہ آئی ایم ایف کو خط لکھا گیا ہے اور اغیار کو دعوت دے کر مداخلت کی درخواست کی گئی، اس سے بڑی ملک دشمنی اور کوئی ہو نہیں سکتی۔
قومی اسمبلی میں قائدِ ایوان نے اپنے خطاب میں کہا کہ جیلوں میں قید خواتین اور بچے جو سنگین جرائم میں ملوث نہیں اور ان کی مدتِ سزا دو برس سے کم ہے حکومت ان کو رہا کر کے تربیتی پروگرام کے ذریعہ ہنر مند شہری بنائے گی، پورے پاکستان میں مستحق ہونہار ہائی پرفارمر بچوں بچیوں کیلئے بیرونِ ممالک معروف یونیورسٹیز میں پڑھنے کیلئے ان کے اخراجات وفاقی حکومت ادا کرے گی اور انکو وظائف دیئے جائیں گے۔
نو منتخب وزیراعظم میاں شہباز شریف کا کہنا تھا کہ اب سبسڈی کھاد اور فیکثریز کی بجائے براہِ راست کسان کو دی جائے گی، سولر ٹیوب ویل کا اجراء کیا جا رہا ہے، بیج مافیا کو ختم کر دیا جائے گا اور دنیا سے اعلٰی ترین بیج منگوا کر اپنے کسانوں کو دیں گے جو پہلی مرتبہ مفت دیا جائے گا۔
انہوں نے کہا کہ آج اگر ہم معجزوں کے منتظر ہیں اور جان لیں کہ اب معجزے اور جادو ٹونے کسی کام نہیں آئیں گے بلکہ تقدیریں محنتی ہاتھوں سے بدلتی ہیں، ہاتھ ہی دعا ہیں اور ہاتھ ہی دوا ہیں، آج میثاقِ معیشت کے ساتھ ساتھ میثاقِ مفاہمت کی بھی دعوت دیتا ہوں، آئیں مل کر بیٹھیں اور پاکستان کی قمست کو سنواریں۔
