راولپنڈی (تھرسڈے ٹائمز) — پاکستان تحریکِ انصاف (پی ٹی آئی) نے حکومت کے ساتھ مذاکرات ختم کرنے کا اعلان کر دیا۔
اڈیالہ جیل راولپنڈی کے باہر میڈیا سے گفتگو کرتے ہوئے پاکستان تحریکِ انصاف (پی ٹی آئی) کے راہنما بیرسٹر گوہر نے کہا ہے کہ آج جیل میں عمران خان (سابق چیئرمین تحریکِ انصاف) نے حکومت کی جانب سے جوڈیشل کمیشن کا اعلان نہ کرنے پر مذاکرات ختم کرنے کا کہہ دیا ہے، تحریکِ انصاف کی خواہش تھی کہ مذاکرات ہوں اور مذاکرات کامیاب ہوں تاہم حکومت کی طرف سے تعاون نہ کرنے پر مذاکرات ختم کر دیئے گئے ہیں۔
راہنما تحریکِ انصاف اور رکنِ قومی اسمبلی بیرسٹر گوہر نے کہا ہے کہ جوڈیشل کمیشن کا اعلان نہ ہونے کی صورت میں مذاکرات آگے نہیں بڑھ سکتے، مذاکرات 3 ججز پر مشتمل جوڈیشل کمیشن بننے کی صورت میں ہی کیے جا سکتے ہیں، عمران خان (سابق وزیراعظم) کا کہنا ہے کہ حکومت کو وقت دیا تھا کہ وہ جوڈیشل کمیشن بنائے لیکن انہوں نے ہمارے مطالبات پر کوئی پیش رفت نہیں دکھائی لہٰذا آج کے بعد کوئی مذاکرات نہیں ہوں گے۔
بیرسٹر گوہر کا مزید کہنا تھا کہ عمران خان (پاکستان تحریکِ انصاف کے سابق چیئرمین) کی ہدایت پر تمام اپوزیشن جماعتوں کے ساتھ مل کر جدوجہد کریں گے اور آئین و قانون کے تحت اپنی کوشش جاری رکھیں گے، تحریکِ انصاف کو کسی بیرونی مدد کا انتظار نہیں ہے، عمران خان اپنا مقدمہ پاکستانی عدالتوں میں ہی لڑیں گے اور پاکستانی عدالتوں سے ہی ریلیف لے کر باہر آئیں گے۔∎
