سیول (تھرسڈے ٹائمز) — شمالی کوریا نے منگل کو کرپٹو کرنسی ایکسچینج بائنانس (Binance) سے 6.3 ارب ڈالر کی ریکارڈ ہیکنگ کی تردید کر دی، جبکہ رہنما کم جونگ اُن کی بہن کم یو جونگ نے اس الزام کو "بے تکی بیان بازی" قرار دیا۔
ایک بیان میں ملک کے جنرل افیئرز ڈیپارٹمنٹ کی ڈائریکٹر کم یو جونگ نے ان دعووں کو امریکہ کی جانب سے شمالی کوریا کی ساکھ کو نقصان پہنچانے کی "مذموم کوشش" قرار دیا۔ ان کا کہنا تھا: "یہ ڈی پی آر کے (DPRK) کے خلاف ایک سنگین سیاسی اشتعال انگیزی ہے کہ امریکہ عالمی رائے عامہ کو یوں گمراہ کر رہا ہے گویا دنیا کے مختلف حصوں میں ہونے والے تمام سائبر جرائم ہمارے کیے دھرے ہیں۔"
ایف بی آئی (FBI) نے اس چوری کا ذمہ دار شمالی کوریا کو ٹھہرایا ہے، جو اب تک کی سب سے بڑی چوری ہے، جبکہ بلاک چین کا تجزیہ کرنے والے ماہرین نے بھی اسی ملک کی طرف اشارہ کیا ہے۔ ایف بی آئی کے مطابق حملے کی قیادت ٹریڈر ٹریٹر (TraderTraitor) نے کی، جو ریاست کی پشت پناہی رکھنے والا گروہ ہے اور لازارس (Lazarus) کے نام سے بھی جانا جاتا ہے، اور اس نے کرپٹو کمپنیوں سے کہا ہے کہ اس گروہ سے منسلک لین دین روک دیں۔ اسی گروہ کو 2025 میں ایکسچینج بائبٹ (Bybit) سے ایک ارب 50 کروڑ ڈالر کی اُس وقت کی ریکارڈ چوری کا ذمہ دار ٹھہرایا گیا تھا۔
شمالی کوریا پر کئی بڑے سائبر حملوں کا الزام لگایا جا چکا ہے اور وہ ہمیشہ ان کی تردید کرتا آیا ہے۔
دنیا کا سب سے بڑا کرپٹو ایکسچینج بائنانس، سیکیورٹی میں نقب لگنے کے بعد تمام لین دین معطل کرنے کے بعد اتوار کو دوبارہ کھل گیا۔ دوبارہ کھلتے ہی صارفین نے 3.6 ارب ڈالر سے زائد رقم نکلوا لی، جبکہ کمپنی کا کہنا ہے کہ اس نے چوری شدہ اثاثوں کا تقریباً 95 فیصد پورا کر دیا ہے۔
