سڈنی (تھرسڈے ٹائمز) — دنیا بھر میں چھوٹے کاروباروں اور طلبہ کی جانب سے استعمال کیے جانے والے آن لائن ڈیزائن ٹول کینوا (Canva) نے ایسی تبدیلیوں کا اعلان کیا ہے جن سے 1,271 ملازمتیں، یعنی عملے کا 22 فیصد، متاثر ہوں گی۔ ان تبدیلیوں میں برطرفیاں اور سڈنی منتقلی شامل ہیں۔ یہ اعلان کمپنی کی شریک بانی اور چیف ایگزیکٹو میلانی پرکنز نے منگل کو کیا۔
میلانی پرکنز نے کہا، "کچھ لوگوں کے لیے اس کا مطلب ان کے کردار میں تبدیلی یا مرکزی مراکز میں منتقل ہونے کا کہا جانا ہوگا۔ افسوس کے ساتھ اس کا مطلب ان ساتھیوں اور دوستوں کو خدا حافظ کہنا بھی ہوگا جنہوں نے کینوا کو آج کی شکل دینے میں مدد کی۔"
انہوں نے کہا کہ "چھوٹی تبدیلیاں کافی نہیں ہوں گی" اور کمپنی کو "کینوا کی نئے سرے سے بنیاد رکھنا ہوگی، یعنی اپنی جڑوں کی طرف لوٹنا ہوگا جو چھوٹی اور بااختیار ٹیموں پر مبنی تھیں"۔ اعلان میں یہ نہیں بتایا گیا کہ 1,271 افراد میں سے کتنے اپنی ملازمت سے محروم ہوں گے۔
کینوا اپنی پروڈکٹ، گروتھ اور پلیٹ فارم ٹیموں کو ایک ہی تنظیم میں ضم کرے گی اور اپنی مزید پروڈکٹ ٹیموں کے لیے سڈنی کو مرکزی مستقر بنائے گی۔ جنوری سے وہ توقع کرے گی کہ ہائبرڈ طریقے پر کام کرنے والے زیادہ تر ملازمین ہفتے میں دو سے تین دن دفتر میں گزاریں۔
کمپنی چھوڑنے والوں کو کم از کم چھ ماہ کی تنخواہ اور 12 ماہ کی طبی سہولت کی کوریج دی جائے گی، اس کے ساتھ انہیں کیریئر کے سلسلے میں معاونت بھی فراہم کی جائے گی۔
اس ہفتے ملازمتوں میں کمی کا اعلان کرنے والی کینوا ویب ٹولز کی دوسری کمپنی ہے۔ ویب سائٹ بنانے والی کمپنی اسکوائر اسپیس نے پیر کو کہا تھا کہ وہ اپنے 19 فیصد عملے کو فارغ کر رہی ہے۔
